KAMONYI: UMUNYAMABANGA NSHINGWABIKORWA W'AGATEGANYO NA BAGENZI BE BAFUNZWE BY'AGATEGANYO IMINSI 30 KUBERA IBYAHA BAKURIKIRANYWEHO

Ku wa 21/07/2021,Urukiko rw’Ibanze rwa Gacurabwenge rwafashe icyemezo gifunga by’agateganyo abarimo Umunyamabanga Nshingwabikorwa w’agateganyo w’Umurenge wa Nyamiyaga, bakaba bakurikiranyweho ibyaha birimo icyo kunyereza umutungo wa Leta ndetse n’ibindi byaha bitandukanye, bakaba bafunzwe by’agateganyo iminsi 30.

Inkuru irambuye

Mu bihe bitandukanye, uhereye ku itariki ya 1/7/2020, abaregwa bakekwaho ibyaha byakorewe Mu murenge wa Nyamiyaga, Akarere ka Kamonyi, mu Ntara y’Amajyepfo, nyuma y’uko hatangijwe iyubakwa ry’ibyumba by’amashuri, ibikoni ndetse n’ubwiherero, mu rwego rwo guteza imbere uburezi no kugabanya ubucucike mu mashuri. 
Ibikorwa by’ubwubatsi mu Murenge wa Nyamiyaga byakorewe ku bigo by’amashuri 8 aribyo: Mukinga, Nyabubare, Bibungo, Munyinya, Ngoma, Magu, Byenene na Bumbogo. Ku nkunga Leta y’u Rwanda yahawe na World Bank, mu myaka ya 2019-2020-2021. Ubuyobozi bw’Umurenge byubakwagamo bukaba bwari bufite mu nshingano guhuza ibyo bikorwa no kubikurikirana.
Ubugenzuzi bwakozwe ku wa 27/05/2021 kugeza ku wa 07 Kamena 2021, bwagaragaje ko hari abafundi bishyuwe amafaranga 2.112.932 Frw, batarakoze ku kigo cy'amashuri cya Munyinya, amafaranga 7.910.000 Frw, yishyuwe amabuye na concasés rwiyemezamirimo atarabigemuye, ahubwo amabuye na Concassés byakoreshejwe byaracukuwe mu isambu y'icyo kigo cy’ishuri.
Hari kandi amafaranga 1.710.000 Frw, yishyuwe Company yitwa M.S Connect ku bintu bitagemuwe, n’amafaranga 22.107.502 yasohokeye ku mpapuro mpimbano, ziriho imikono itariyo n’amafaranga 100.000 yishyuwe Campany Salem contra actors Ltd, arenga kuyo bagombaga kwishyurwa, n’amafaranga 2.247.045 frw yasohotse hishyurwa imibyizi itarakozwe.
Umunyamabanga Nshingwabikorwa wungirije w’Umurenge wa Nyamiyaga n’umucungamutungo w’uwo murenge, bakekwaho ibyaha birimo icyo kunyereza umutungo wa Leta; gukoresha nabi umutungo ufitiye rubanda akamaro, icyaha cyo guhimba, guhindura inyandiko cyangwa gukoresha inyandiko mpimbano ndetse no gukora inyandiko zitavuga ukuri.
Umuyobozi w’ishuri rya Mukinga akekwaho guhimba inyandiko yaba yarafatanyije na n’Umunyamabanga Nshingwabikorwa wungirije w’Umurenge, bakoze bigakekwa ko bagiye bigana signature. Umuyobozi w’ishuri rya Mukinga ku giti cye akaba akekwaho n’icyaha cyo gukora ibikorwa by’ubucukuzi bw’amabuye y’agaciro cyangwa kariyeri nta ruhushya. 
Ba rwiyemezamirirmo babiri bari batsindiye amasoko yo kugemura ibikoresho bitandukanye birimo amabuye, Concassés, imicanga n’amatafari, bakaba bo bakekwaho kuba ibyitso mu cyaha cyo kunyereza umutungo wa Leta, bashobora kuba barafashije Umunyamabanga Nshingwabikorwa wungirije w’Umurenge n’umucungamutungo w’uwo murenge gukora.
Uwari uhagarariye imirimo y’ubwabatsi (Foreman /Chef de Chantier) n’umwalimu wari woherejwe n’ubuyobozi bw’Umurenge ngo abureberere ku nyubako y’ikigo gishyashya cyubakwaga, bakekwaho kunyereza umutungo wa Leta no gukoresha nabi umutungo ufitiye rubanda akamaro, aho bahimbye inyandiko z’Abasuderi n’Abafundi batakoze. (Umwalimu yarekuwe by’agateganyo).
Umunyamabanga Nshingwabikorwa w’Akagali ka Mukinga ikigo cy’amashuli cya G.S. Mukinga cyubatsemo, akekwaho icyaha cyo kutamenyekanisha icyaha cy’ubugome cyangwa gikomeye. Icyo kigo kikaba kiri mu marembo y’ibiro by’Akagali, hacurwaga amabuye yubakishijwe ibyumba by’amashuri byongewe muri icyo kigo, arebera ntabitangire raporo.(yarekuwe by’agateganyo).

Share Button